Yula.la ຂ່າວ

ໃນເວລາທີ່ທ່ານຈະຊື້ ຂາຍ ຫຼື ເຊົ່າອະສັງຫາລິມະຊັບໃນລາວ ແນ່ນອນວ່າມັນຈະມີຄ່າໃຊ້ຈ່າຍເພີ່ມເຕີມຢ່າງເຊັ່ນຄ່ານາຍໜ້າແລະຄ່າປະເມີນ ຖ້າຫາກທານເລືອກທີ່ຈະຕິດຕໍ່ຕົວແທນການຂາຍໃນການຫາທີ່ຢູ່ທີ່ທ່ານມັກ. ຢ່າລືມວ່າທ່ານຄວນຈະສຶກສາແລະສອບຖາມເລື່ອງຕົວແທນຈຳໜ່າຍຢ່າງລະອຽດ ເພື່ອທີ່ທ່ານຈະໄດ້ຮັບການບໍລິການທີ່ດີ ແລະ ຈ່າຍໃນລາຄາທີ່ສົມເຫດສົມຜົນ

ຄ່ານາຍໜ້າ ແລະ ຄ່າປະເມີນສຳລັບອະສັງຫາລິມະຊັບໃນລາວຄິດໄລ່ດັ່ງນີ້

ຕົວແທນການຂາຍໃນປະເທດລາວມີໜ້າທີ່ເປັນນາຍໜ້າທີ່ຈັດສັນ ໂຄສະນາ ແລະ ກຳໜົດມື້ັນັດໝາຍໃຫ້ແກ່ຜູ້ຊື້/ເຊົ່າ ແລະ ຜູ້ຂາຍ/ຜູ້ປ່ອຍເຊົ່າ. ຕົວແທນສ່ວນໃຫຍ່ໃນລາວຈະເກັນຄ່ານາຍໜ້າຢ່າງຕ່ຳ 3% ຂອງລາຄາຂາຍ ຫຼັງຈາກຕົກລົງສັນຍາຊື້. ໃນກໍລະນີເຊົ່າ ຖ້າເຊົ່າເປັນລາຍປີ ທ່ານຈະໄດ້ຈ່າຍຄ່ານາຍໜ້າເປັນຈຳນວນຂອງຄ່າເຊົ່າຕໍ່ເດືອນ. ຈັ່ງໃດກໍ່ຕາມ ຄ່ານາຍໜ້າແມ່ນຂຶ້ນຢູ່ກັນການເຈລະຈາກັບຜູ້ຂາຍຫຼືຕົວແທນການຂາຍ.

ໃນສ່ວນຂອງຄ່າປະເມີນ ຜູ້ທີ່ເປັນເຈົ້າຂອງອະສັງຫາລິມະຊັບນັ້ນຕ້ອງຈ້າງບໍລິສັດປະເມີນ ເພື່ອລະເມີນມູນຄ່າຂອງສະຖານທີແລະຄິດໄລ່ຄ່າບໍລິການ. ໂດຍປົກກະຕິແລ້ວ ທາງບໍລິສັດປະເມີນຈະຂໍຂໍ້ມູນຂອງສະຖານທີເພື່ອຄິດໄລ່ລາຄາແລະອອກໃບສະເໜີລາຄາໃຫ້ລູກຄ້າ, ເມື່ອລູກຄ້າເຫັນດີແມ່ນຈະຈະມີການເຊັນສັນຍາມອບຮັບວຽກປະເມີນ ເພື່ອເປັນອ້າງອີງໃນການປະຕິບັດວຽກງານ ແລະ ເລີ່ມລົງປະເມີນ ໂດຍການລົງສຳຫຼວດພື້ນທີ່ຕົວຈິງ, ກວດສອບທາງກາຍຍະພາບ ແລະທາງກົດໝາຍຂອງຊັບສິນ, ສອບຖາມກັບນາຍບ້ານ ທີ່ດິນເມືອງ, ແຂວງ ແລະ ນະຄອນຫຼວງເພື່ອເກັບຂໍ້ມູນ ກ່ຽວກັບທີ່ດິນ ແລະ ຂໍ້ມູນອື່ນໆກ່ຽວກັບອະສັງຫາລິມະຊັບ. ຕົວຢ່າງ ຖ້າອະສັງຫາລິມະຊັບມີມູນຄ່າຕ່ຳວ່າ $100,000 (930,000,000 ກີບ) ເຈົ້າຂອງຕ້ອງຈ່າຍຄ່າປະເມີນຢ່າງຕ່ຳ 0.17% ຫຼື $170 (1,585,000 ກີບ). ບໍລິສັດປະເມີນແຕ່ລະບ່ອນຈະມີການຄິດໄລ່ຄ່າບໍລິການອີງຕາມກໍລະນີ ໂດຍມີການຕົກລົງລ່ວງໜ້າລະຫວ່າງເຈົ້າຂອງແລະບໍລິສັດ.

ເພື່ອຫຼີກລ້ຽງຄ່າທຳນຽມທີ່ບໍ່ຈຳເປັນຕາມຂໍ້ຕົກລົງຂອງທ່ານ ກັບເຈົ້າຂອງຫຼືຕົວແທນ, ທ່ານຕ້ອງແນ່ໃຈວ່າຂໍ້ຕົກລົງນັ້ນມັນຕົງກັບຄວາມຕ້ອງການ ແລະຄວາມກັງວົນຂອງທ່ານ ແລະເພື່ອໃຫ້ທຸກຝ່າຍພໍໃຈກັບຂໍ້ຕົກລົງທີ່ວາງໄວ້. ທ່ານສາມາດສອບຖາມຂໍ້ມູນແລະຄ່າໃຊ້ຈ່າຍກັບຕົວແທນການຂາຍຫຼືບໍລິສັດອະສັງຫາລິມະຊັບໂດຍກົງ.

ບົດຄວາມໂດຍ : ວະນິດາ ສຸວັນນະວົງ